گۆران

ھەڵدانەوەی لاپەڕەی کۆنی عومرە

بۆیە فرمێسک لە چاویایە ئەم شیعرە!

کوردستانی ئەو سەردەمە وا تار بوو،

بەفری زستان گوڵی باغچەی بەھار بوو

بولبولەکان لە قەفەسا قەتیس بوون

لە سەرمانا ئەلەرزین، وەک گوڵ سیس بوون

ئەو مەلانەی داڵدەیەکی گەرمیان بوو،

دانەوێڵەی چینە مایەی شەرمیان بوو

پەڕەی گوڵیان بە ڕەنگی «ڕوو» سوور ئەکرد،

وا ھەڵبەستیان پێشکەش بەرەوژوور ئەکرد

جار جار لە پاڵ مەتحی درۆی زۆردارا،

چەن گوڵێکیش ئەکرا بە قژی یارا…

یاری ھەڵبەست یان ھیی تێری بێدڵ بوو،

یان ھیی لاتی ناپەسەندی لای گوڵ بوو…

بەڵێ ھەبوو بولبولی وایش، برسی بێ،

تەماع ھەرگیز شیعری پێ نەنووسیبێ

ھەرە برسی و ھەرە لێبووردووی دەستە

«بێکەس» زیاتر، خەباتی خستە بەستە،

لە باغێکا فرمێسکی «خانی» ئەڕژا،

دڵی «حاجی» لە ئاگرا ئەبرژا،

«بێکەس» دڵی بڕوای نەدا خامۆش بێ،

لە بەستەیا نیشتمان فەرامۆش بێ!

لە ڕووی شیری ڕووتا وەستا و نەڕانی،

ئازادیی ویست بۆ گەل و نیشتمانی!

زمان بڕین سزای قسەی نەستەق بوو،

توانجی «بێکەس» بۆ دوژمن بەردی ڕەق بوو

کزی چاو بوو، بە چاوی ھۆشمەندی

لە ئاسۆی دوور برایەتیی کرد بە دی،

لە ناو ھەردوو نەتەوەی عەرەبا و کورد،

بە بانگی بەرز ئەمەی خستە شیعری ورد

لە کاتێکا دەستی دوژمنی نامەرد

تۆوی کینەی چاندبوو وەک گەرای دەرد،

بەو نیازەی بکەوێتە خۆخۆری:

کورد و عەرەب، تورکمان و ئاسۆری!

***

ئەمویست «بێکەس» ئێستا بە سەر بژیایە،

ئەم گەرمییەی برایەتیی بدیایە

بیزانیایە براگەورەی عەرەبمان،

چەن دڵسۆزە بۆ خزمەتی ئەدەبمان

بیزانیایە گەوھەری نرخی «بێکەس»

براکانی چۆن ئەیگێڕن دەساودەس!

«بێکەس»! لەشت با لە خاکا ڕزیبێ،

با مرۆڤیت بە یاسای مەرگ ڕازی بێ،

بەڵام بولبول کە ئامانجی لەم ژینە:

بەس خوێندنی بەستەی شیرین شیرینە،

تاکوو دەنگی چریکەی بێ لەسەر دار،

ھەر زیندووە و ھەر بولبولە و ھەر باڵدار؛

کە وا بێ تۆیش تاکوو «داری ئازادی»

بەستەی کوردە، ئەژییت، نەمری یادی!

وەڵامێک بنووسە